Почитувани, La Colonie Volvox со задоволство Ви го претставува новиот албум “Blue Bird”, со кој го заокружија музичкото патување кое ги донесе повторно на базичните музички концепти – пишување текстови, мелодии и аранжмани. За разлика од повеќегодишното експериментирање со џезот, слободната импровизација и традиционалната музика, отсликано во претходните пет изданија, “Blue Bird” е албум со 10 песни (8 авторски и 2 обработки) и со естетика која наликува на онаа од нивните музички херои – The Beatles, Pink Floyd, The Doors и Frank Zappa, но и на Nick Cave и Tom Waits, како и на старите блуз мајстори. Од кабаретската атмосфера на љубовните песни кои го сочинуваат првиот дел од ова издание, албумот преоѓа во жесток блуз, рок , па дури и кантри, а политичките и социјални теми ги заменуваат љубовните мотиви. Како што велат самите учесници, создавањето на “Blue Bird” беше тест за нивните композиторски вештини и креативност, кои долго време беа тргнати на страна. Јадрото на бендот овој пат беа Сашо Гигов – Гиш, Драган Стојковски и Предраг Икономовски кои во еден спонтан момент решија да создадат музика која ќе ги врати назад на корените – авторски песни кои може да се пеат во секоја прилика. Во процесот им се придружија Гоце Наумов и Ненад Неделков (членови на овој колектив уште од самите почетоци), но и бројни гости и пријатели кои допринесоа во креирањето на ова дело – Владо Манчевски, Игор Атанасовски – Харе, Сашо Ѓорѓевски, Ади Имери, Златко Михајловски – Бумбар, Симон Киселички, Александар Николовски, Сашко Николовски и Огнен Анастасовски. Албумот е миксан во студиото MarryPhat од страна на Ивица Јанкуловски и Драган Стојковски, а обвивката е дело на Анастасија Величковска. Албумот може да се симне преку директно од нивната страна на Bandcamp, а официјална промоција на CD-то ќе има во Април, по која албумот ќе може да се купи во тврд формат во продавниците во Скопје и земјата.
https://la-colonie-volvox.bandcamp.com/album/blue-bird
La Colonie Volvox FB fan page
