Приказната за островот во реката Вардар на кој се одржувале коњски трки и кој, згора на тоа, бил долг околу три километри, звучи навистина неверојатно, па дури и фантастично! Остров во реката Вардар? Да, тој навистина постоел и бил земен рај од зеленило и чиста природа. Пошумени патеки и парцели со разновидни насадени дрвја, простори за одржување на трки, патеки за шетање, мали пристапни мостови. Со еден збор, земна и небесна убавина! Тука трките ги организирало познатото Здружение на вардарските јавачи. Каква симболика: вардарските јавачи јавале токму тука, на тој прекрасен остров во реката Вардар. И не само тоа. Островот бил монденско место, тука се појавувал кремот на градот, на разни приредби и свечености.
Замислете, пред почетокот на трките се одржувале ревии на женска мода и елеганција! Сe почесто на натпреварите присуствувале и дами. Во еден запис од 1932 година се вели: “Елегантните скопски дами, за чии фустани нашиот моден соработник многу пофално се изрази, со своето присуство придонесоа трките во Скопје да добијат имиџ на вистински велеградски трки”. Сето ова наликува на тркалиштата во Париз и во Лондон, опишани во многу романи и филмови. Но тоа не е сe. Пред трките се одржувале фудбалски натпревари, а бил приредуван и препонски карусел, кој го изведувале офицерите. Екстравагантно изведените фигури со коњи предизвикувале воодушевување кај публиката. Биле одржувани изложби на коњи, потоа офицерско-џентлменско наградно прескокнување, коњски трки на градот Скопје. А по сите тие настани, започнувала забавата, за што однапред биле давани известувања: “По коњичката трка се приредува кермес (забава) на тркалиштето, кое ќе биде осветлено со лампиони. Постојано ќе свири музика”.
Зачувани се и имињата на коњските грла кои биле омилени кај публиката: Кармен, Изонда, Треф, Дидо, Ружа, Галопина, Зорица, Цимер. Постоеле и парични награди за натпреварувачите: прва награда – 1.200 динари, втора – 600, трета – 300 и четврта – 150 дин. Се наплаќало такса за секоја патека по 30 дин. Пред обложувалницата постојано имало метеж и чекање. Навистина, колкав бил тој фантастичен остров на кој имало трибини за публика, простор за фудбалски натпревар, за коњски трки, како и за ревии и прошетки? Според податоците, островот се градел цели три години, а официјално бил пуштен во употреба 1932 година. Но најинтересно е прашањето за тоа каде се наоѓал и дали може од денешен аспект да се одреди неговата местоположба. Коритото на Вардар често пати се менувало, а денешното е посебно регулирано. Едно е сигурно: островот се наоѓал во близина на Градскиот парк, но каде? Морав да направам споредба на многу записи за да дојдам до вистинската локација.
Во еден запис се вели дека се наоѓал во близина на една тениска полјанка зарасната во трева, зад Идадија, кон реката. Бидејќи Градскиот стадион во тоа време не постоел на тоа место, од тениската полјанка, веројатно, се гледало тркалиштето и било близу. На друго место се споменува просторот наспроти Зоолошката градина, а бидејќи таа е близу до тениската полјанка, можно е и такво одредување. Но најточна одредба за местоположбата дава еден запис, кој, за среќа, прецизно зборува за тој простор. Имено, бидејќи секој немал пари да плати карта за трибините на тркалиштето, луѓето го користеле спротивниот брег на реката Вардар за да ги следат трките. Толпа луѓе биле искачени на ридот кај Француските гробишта, од каде што можеле убаво да следат што се случува на островот. Значи, тој се наоѓал меѓу денешната северна трибина на стадионот, односно станбениот комплекс популарно наречен “Кинески ѕид” и спротивниот брег, каде што се наоѓа вечното почивалиште на француските војници. Еве што се вели во тој запис: “Немаше народ само на тркалиштето. Од другата страна на Вардар, на ридот каде што се Француските гробишта, па и на самите гробишта, беше присутна голема толпа луѓе. Жителите на Топаана излегоа во толкав голем број на Француските гробишта, така што нивната посета можеше слободно да се спореди со бројот на луѓето присутни на тркалиштето”.
Општината имала големи планови за островот: тој да биде парк-шума и пријатно место за прошетки и излети. Низ него, со текот на времето да протекува канал и да се оформи убаво вештачко езеро. Пошумените блокови ќе служеле и за сончање, бидејќи имало ситен песок. Предноста на островот била таа што тој се наоѓал во близина, “речиси во самиот град”. Фантастичниот утописки остров со текот на времето исчезнал, му се загубила секаква трага. Тој е еден вид наша, скопска варијанта на исчезнатата Атлантида. Сигурно има повеќе причини за исчезнувањето, а едната од нив е и големата поплава што го зафатила Скопје во 1935 година. По Втората светска војна, коњичкиот спорт имал успешен развој во градот.
Данило Коцевски, Скопски легенди